Category

Uncategorized

Biblioteka e Arkivit Qendror Shtetëror pasurohet nga Akademia e Shkencave

By | Uncategorized | No Comments

Akademia e Shkencave pasuroi sot Bibliotekën e Arkivit Qendror Shtetëror duke i dhuruar dhjetra libra. Në këtë dhurim të pranishëm ishin Drejtori i Përgjithshëm i Arkivave Dr. Ardit Bido, Nënkryetari i Akademisë së Shkencave, akademiku Vasil Tole, studiuesi Irakli Koçollari dhe stafi i Bibliotekave të dy institucioneve.

Akademiku Vasil Tole shprehu kënaqësinë që ndodhej në mjediset e Dpa-së, për këtë xhest simbolik të dhurimit të librave shkencor, që akademikët përgjithësisht, studiuesit shqiptarë botojnë përmes entin botues të Akademisë së Shkencave. “Është kënaqësi dhe një shenjë e qartë e bashkëpunimit afatgjatë që Akademia e shkencave si institucion, ish institutet në varësi të saj por dhe akademikët sot kanë në Arkivin Qendror të Shtetit në të gjitha nivelet, jo vetëm në Tiranë, po kudo ku ka Arkiva në Shqipëri, pasi gjykojmë që edhe këto vepra do të ishin të pamundura që të krijoheshin, për më tepër pastaj të botoheshin pa kontributin dhe veprimtarinë e Arkivave të Shqipërisë dhe posaçarisht të dokumentacionit që administrohet në këto Arkiva” -tha akademiku Vasil Tole.

Z.Tole falenderoi z.Bido dhe të gjithë punonjësit e Arkivave që po u krijojnë kushte studiuesve për t’i shfrytëzuar këto dokumente dhe theksoi se ky nuk është dhurimi i fundit por është thjesht një hap që Akademia e Shkencave dhe sektori përkatës i botimeve në Akademi bën për këto dhurime.

Drejtori i Përgjithshëm i Arkivave, z.Ardit Bido, i shprehu mirënjohjen z. Tole për dhurimin e librave për bibliotekën, duke e pasuruar më tej atë.

“Dua të falenderoj profesor Vasil Tolen dhe profesor Irakli Koçollarin për këtë ndihmesë të vazhdueshme që Akademia e Shkencave bën për Arkivin Qendror Shtetëror. Dhurimi i këtyre librave vjen në fakt në kuadër të diçkaje shumë të rëndësishme që është krijimi i një Biblioteke Qendrore në mjediset e Drejtorisë së Përgjithshme të Arkivave, ku të gjithë studiuesit jo vetëm të kenë mundësi që të ndjekin dhe të shohin dhe të studiojnë materialin arkivor por dhe materialin bibliotekar”-u shpreh z.Bido. Ndërsa shtoi se Biblioteka ka qenë një magazinë librash deri më tani në Drejtorinë e Përgjithshme të Arkivave. “Proçesi i punës është në fazën finale ku thuajse klasifikimi ka përfunduar po përgatisim software dhe besoj për shumë shpejt mbase në dhjetor – janar do të jetë e aksesueshme për studiuesit, që në çastin që vijnë në sallën e studimit mund të porosisin dosje arkivore por njëkohësisht të mund të porosisin edhe libra” -tha z.Bido.

Studuesi Irakli Koçollari tha në fjalën e tij se Arkivi ka në thelbin e tij materialet unike në vlerat e tyre, dokumente që fillojnë që nga dorëshkrime deri në dokumentet më të rralla, që gjenden vetëm në Arkiv dhe askund tjetër.

“Ky dokumentacion që gjendet në Arkiv, një pjesë e tij natyrisht është përpunuar, kur themi është përpunuar, është marrë nga studiues, nga shkencëtar të fushës përkatëse dhe e ka sjell atë jo më një si një dokument të vetëm dhe unik por dhe të lidhur me shumë sfonde të tjera të caktuara, siç është sfondi historik, persona dhe personalitete, në tërësi e shkëput nga mëvehtësia dokumentin dhe e bën atë të lidhur me sfondin historik të shumë ngjarjeve dhe të shumë fenomeneve. Fondi sigurisht këtu është i pafund, që është këtu dhe askund tjetër, por një pjesë e tij siç edhe e thash është përpunuar në tematika dhe subjekte të caktuara, dhe në këtë mënyrë studiuesit e gjejnë jo vetëm si një dokument të vetëm por edhe të përpunuar, të unifikuar, në një produkt të gatshëm. Ndaj është e nevojshme dhe prania e studimeve dhe burimeve dytësore krahas burimeve parësore historike, për të krijuar një lehtësi dhe qartësi në interpretimin e dokumenteve historikë”-tha studiuesi z.Koçollari.

Biblioteka e Arkivit Qendror Shtetëror administron dhe ruan mbi 10.000 libra. Natyra e librave në bibliotekë është e larmishme, midis tyre gjenden Enciklopedi, libra historikë, fetarë, fjalorë, fletore zyrtare, metoda, etj. Librat janë të viteve të ndryshme, ata më të hershmit janë klasifikuar tek fondi i librave të rrallë dhe ruhen në Dhomën e Fortë të AQSh. Gjuha e librave është e ndryshme, ka në italisht, frengjisht, greqisht, latinisht, osmanisht, etj. Kjo bibliotekë ka një traditë pasurimi përmes studiuesve të cilët shfrytëzojnë sallën e AQSh për studimet e tyre. Në nxjerrjen në dritë të botimeve këta studiues dhurojnë një kopje në bibliotekën e AQSh.

Krahas pasurimit të vazhdueshëm të Bibliotekës, në Drejtorinë e Përgjithshme të Arkivave po punohet çdo ditë për inventarizimin digjital dhe për pasqyrimin e këtij skedari në variantin elektronik, me synimin që Biblioteka të jetë më e lehtë e aksesueshme në shfletimin e informacionit bibliografik.

Thirrje për Trajnim Arkivor

By | Uncategorized | No Comments

Drejtoria e Përgjithshme e Arkivave ju bën thirrje të gjithë nëpunësve të institucioneve shtetërore por dhe individëve të tjerë të interesuar për punën me dokumentet, për të marrë pjesë në seminarin që do të zhvillohet për punën në arkiv – protokoll, nga data 21 Tetor 2019 deri më 1 Nëntor 2019.

Ky seminar ka për qëllim ngritjen profesionale dhe shkencore të punonjësve të sekretari-arkivave të institucioneve shtetërore qëndore dhe vendore, për njohjen dhe zbatimin e Ligjit “Për Arkivat’’ si dhe “Norma tekniko-profesionale dhe metodologjike të shërbimit arkivor në Republikën e Shqipërisë”.

Temat kryesore që do të trajtohen  në këtë seminar do të jenë jenë:

1- Njohje me Ligjin “Për arkivat” dhe “Norma tekniko-profesionale dhe metodologjike të shërbimit arkivor në Republiken e Shqipërisë”.

2- Evidentimi i dokumenteve, qarkullimi dhe sigurimi i tërësisë së tyre në sekretari, si dhe mjetet e evidentimit.

3- Klasifikimi,sistemimi i dokumenteve arkivore, kriteret e klasifikimit, skemat e klasifikimit, kriteret e krijimit të njësive të ruajtjes, përshkrimi, renditja, inventarizimi dhe dorëzimi i dokumenteve .

4- Ekspertiza e vlerës së ruajtjes së dokumenteve, përmbajtja, qëllimi, parimet, kriteret, dhe organizimi i punës për kryerjen e saj.

5- Përpilimi i shkresave zyrtare si dhe rregullat për krijimin dhe zbatimin e elementëve të dokumentit.

6- Faktorët dëmtues të dokumenteve, mbrojtja dhe kushtet e ruajtjes e tyre

7 -Teknologjia dixhitale, dixhitalizimi i dokumenteve

8- Praktikë: njohuritë e marra në leksione dhe zbatimi i tyre në proceset e punës arkivore.

Në përfundim të seminarit pjesëmarrësit do të pajisen me certifikatën përkatëse. Për të marrë pjesë mund të aplikoni nëpërmjet emailit në  dpa@arkiva.gov.al deri më 10 tetor 2019.

Të gjithë të kualifikuarit që do të vazhdojnë këtë seminar do të njoftohen individualisht po nëpërmjet emailit.

Ekspozitë e DPA-së: Zemër Shqiptare, Shën Tereza na bashkon!

By | Uncategorized | No Comments

Drejtoria e Përgjithshme e Arkivave, me rastin e 22 vjetorit të ndarjes nga jeta e Nënë Terezës, duke përkuar dhe me 5 shtatorin, Ditën e Shenjtërimit të saj, hapi ekspozitën “Zemër Shqiptare, Shën Tereza na bashkon – 22 vjet pas kalimit në amshim të Shën Terezës”.

Ky projekt vjen në bashkëpunim mes Drejtorisë së Përgjishme të Arkivave, Kalasë së Tiranës dhe Institutit të Trashëgimisë Shpirtërore dhe Kulturore të Shqiptarëve të Maqedonisë së Veriut. Në ekspozitë u shpalosën dokumente dhe fotografi nga aspekte interesante të jetës dhe veprës së Shën Terezës.

Në këtë aktivitet ishin të pranishëm, përgjegjësja e Promovimit dhe Komunikimit në DPA Elsa Saka, nënkryetari i Bashkisë së Tiranës Andi Seferi, administratorja e Kalasë së Tiranës Klodjana Toptani, ambasadori i Kosovës në Shqipëri Sylë Ukshini, nga Kisha ortodokse Arkimandrit Kozma Prifti, etj.

Shën Tereza, humanistja shqiptare, nobelistja, misionarja e jashtëzakonshme, e bekuara e Vatikanit, e cila çdo ditë të jetës së saj ia kushtoi bamirësisë, kujtohet në këtë ekspozitë e cila do të qëndrojë e hapur deri të dielën, më 8 shtator, në ambientet e Kalasë së Tiranës.

350 mijë dokumenta osmane, pasurimi më i madh i AQSH-së ndër vite

By | Uncategorized | No Comments

Drejtoria e Përgjithshme e Arkivave ka kënaqësinë të njoftojë të gjithë shqiptarët mbi pasurimin më të madh të Arkivit Qendror Shtetëror me dokumente mbi historinë tonë kolektive kombëtare, të ndodhur në një dhurim të vetëm.
Më shumë se 350 mijë fletë dokumente që datojnë nga shekulli i 15 deri në çerekun e parë të shekullit të XX mbi Shqipërinë dhe shqiptarët janë marrë nga Arkivi Qendror i Perandorisë Osmane me qendër në Stamboll në formë dixhitale, kjo falë marrëveshjes së bashkëpunimit që Drejtoria e Përgjithshme e Arkivave ka me Arkivin Qendror të Stambollit për shkëmbimin e dokumenteve arkivore nga të dyja palët.
Kjo shumë përbën përafërsisht gjysmën e të gjithë dokumenteve që Arkivi I Stambollit ka mbi Shqipërinë dhe shqiptarët dhe që pjesa tjetër pritet të merret shumë shpejtë.
Pjesa më e madhe e tyre i përkasin shekullit 19 dhe 20, ku tregohet për zhvillimet për Shqipërinë e shqiptarët në Perandorinë Osmane, reformat, kryengritjet shqiptare dhe masat osmane për t’i shtypur ato, çështjet fetare, arsimore, ku madje trajtohet edhe çështja e shkrimit të gjuhës shqipe.
Dokumenti më i vjetër daton më 8 shkurt 1455 dhe është një regjistër që përfshin timare në Rumeli ku përfshihen dhe qytetet shqiptare si Prizreni, Janina dhe Elbasani.
Ndër materialet që arkivi ka marrë është edhe urdhëresa që u është dërguar mytasarifëve të Ohrit, Vlorës, Delvinës, valiut të Bosnjës dhe myteselimit të Podgoricës, për arrestimin e mutasarifit të Shkodrës Mahmut Pashës dhe vëllait të tij Ahmet Pashës, të Bushatllinjve, për shkak se kanë bashkëpunuar me kryengritësit shqiptarë dhe malazezë.
Në mesin e këtyre dokumneteve ndodhet edhe fermani me këshilla administrative që i është sjellë Ali Pashë Tepelenës për të siguar rregullin dhe qetësinë në kalanë e Pargës, Prevezës, Potrinit dhe Dubnicës, që u rimorën prej francezëve.
Po ashtu, një ndër dokumentet është edhe shkresa e përgjegjësit të Moresë, Ahmet Pashës, ku urdhërohet Kurt Pasha dhe pashallarët e tjerë për të mos lejuar kthimin e shqiptarëve të shpërngulur përsëri në More, pra arvanitasit.
Edhe pjesa tjetër e materialeve të tjera po ashtu janë shkresa, urdhëresa dhe fermane që japin një pasqyrë për zhvillimet politike dhe shoqërore të shqiptarëve nën Perandorinë Osmane, ndërsa ka edhe të dhëna biografike të Ismail Qemalit si nëpunës i administratës osmane.
Ky pasurim përbën përpjekjen disavje]are të arkivit shqiptar. Më herët, gjatë vitit 2015 janë marrë përafërsisht 5 mijë fletë dokumente. Tashmë, janë marrë 350 mijë dokumente dhe po aq pritet të mbërrijnë Brenda këtij viti. Në këtë mënyrë, AQSH përmban sot jo vetëm tërësinë e historisë dokumentare të Shqipërisë dhe shqiptarëve pas pavarësisë, por edhe të periudhës osmane, me përjashtim të dokumenteve pronësore.

 

Studentët njihen me trashëgiminë kulturore bizantine dhe pasbizantine në Shqipëri

By | Uncategorized | No Comments

Sot në Drejtorinë e Përgjithshme të Arkivave u zhvillua seminari i Shkollës Verore e Gjuhës, Historisë dhe Civilizimit Bizantin.

Përmes leksioneve dhe referateve studentët u njohën me dokumente në gjuhën greke. Ata panë nga afër kodikët të cilët ruhen në Arkivin Qendror Shtetëror.

Nga pedagogu Andi Rembeci, përgjegjës dhe koordinator i Shkollës Verore ndoqën leksionin “Duke shfletuar Bizantin nga Shqipëria: Kodikë-Tekste-Art”, kurse profesor Agamemnon Tselikas, autoritet botëror në Paleografi, ligjëroi në temën “Vështrim mbi të dhënat arkivore bizantine dhe dokumente të diplomatikës”.

“Jemi në një institucion shumë të rëndësishm, jemi në mjediset e Arkivit, që është zemra e historisë së çdo shteti. Nga këtu ku jemi ju mund të kuptoni rëndësinë dhe vlerën që ka ky mjedis dhe se çfarë do të thotë që ju të studioni materiale që doni” u shpreh profesor Agamemnon Tselikas.

Drejtori i Drejtorisë së Përgjthshme të Arkivave Dr.Ardit Bido në fjalën e tij përshëndetëse tha se dyert e Arkivit janë gjithnjë të hapura për cilindo studiues, pasi Arkivi është pjesa thelbësore e kërkimit shkencor.

“Arkivi Qendror Shtetëror është një arkiv i cili është krijuar vonë, në vitin 1948 dhe si rrjedhojë dhe materialet që ne disponojmë në numër është shumë i vogël, në krahasim me arkivat e tjera analoge të vendeve të tjera perëndimore. Nuk kemi dokumentacion mjaftueshëm përpara vitit 1912 por kemi dokumentacion përpara ’12 të vogël por sifinjikativ, kemi një ndër kodikët më të vjetër që ekziston në botë, kodikun e purpurt të Beratit, i cili është pjesë e trashëgimisë botërore. Edhe pse kemi dokumentacion të pakët mund të themi se kemi dokumentacion të pasur dhe ndonjëherë është cilësia e cila ka më shumë vlerë se sa sasia” tha Dr.Bido.

Kjo shkollë organizohet për të tretin vit radhazi nga Departamenti i Historisë në Fakultetin e Historisë dhe të Filologjisë, nën kujdesin e Ambasadës së Greqisë në Tiranë dhe me mbështetje të Fondacionit Alexander S. Onassis dhe National Bank οf Greece Cultural Foundation.

DPA nënshkruan marrëveshje bashkëpunimi me Shoqatën “Papa Klementi XI Albani”

By | Uncategorized | No Comments

Drejtoria e Përgjithshme e Arkivave nënshkroi sot një marrëveshje bashkëpunimi me Shoqatën e Shkrimtarëve dhe Artistëve Shqiptar “Papa Klementi XI Albani” në Suedi. Marrëveshja si qëllim ka bashkëpunimin midis dy institucioneve në fushën e botimeve dhe aktiviteteve të përbashkëta shkencore dhe kulturore.

Drejtori i Drejtorisë së Inspektimit dhe Trajnimit z.Endrit Musaj tha se ndihej i lumtur që pas takimit dhe njohjes me Shoqatën e Shkrimtarëve dhe Artistëve Shqiptar “Papa Klementi XI Albani” në Konferencën e III Mbarëkombëtare të Arkivistikës në Shkup po ndërmerret ky hap cilësor për bashkëpunim. “Kjo marrëveshje ka të bëj me hulumtime, botime, simpoziume, veprimtari të përbashkëta, qoftë në Shqipëri, Suedi apo Kosovë. Uroj që kjo marrëveshje nuk do të jetë vetëm formale dhe të ngelet në letër por të konkretizohet me punë” u shpreh z.Musaj.

Kryetar i shoqatës “Papa Klementi XI Albani” z.Hysen Ibrahimi falenderoi Drejtorinë e Përgjithshme të Arkivave për mirëpritjen dhe për këtë bashkëpunim shumë të sinqertë. “Marrëveshja e bashkëpunimit mes institucioneve ka të bëj dhe me shkëmbimeve të ndryshme të materialeve të arkivistikës apo punëve studimore, madje ne sot i kemi sjell Drejtorisë së Përgjithshme të Arkivave ne formë digjitale 10 numra të librit “Thesar Kombëtar i Mergates Shqiptare, i cili permban shumë shënime dhe dokumente, kryesisht për veprimtari dhe çështje të Kosovës por edhe Shqiptare” tha Ibrahimi.

Ardit Bido, Drejtori i Përgjithshëm i Arkivave pritet në takim nga Drejtori i Arkivave Shtetërore Kroate, Dinko Cutura

By | Uncategorized | No Comments

Drejtoria e Përgjithshme e Arkivave zhvilloi sot në Drejtorinë e Arkivave Shtetërore të Kroacisë një vizitë zyrtare për të rivendosur marrëdhëniet midis dy institucioneve. Kjo vizitë konsistoi në trajtimin e pikave kryesore në lidhje me mundësitë për të zhvilluar aktivitete të ndryshme mes dy institucioneve.

Të pranishëm në këtë takim ishin Drejtori i Arkivave Shtetërore Kroate, z.Dinko Cutura, Drejtori i Përgjithshëm i Arkivave Dr.Ardit Bido, Ambasadori i Republikës së Shqipërisë në Zagreb, z. Riza Poda dhe përfaqësues të dy institucioneve.

Drejtori i Arkivave Shtetërore Kroate, z.Dinko Cutura u shpreh se ndihej shumë i lumtur që mirëpriste përfaqësues nga Drejtoria e Përgjithshme e Arkivave dhe vlerësoi mundësinë për bashkëpunime të ndryshme, si ekspozita, botime si dhe mundësinë e firmosjes së një marrëveshjeje bashkëpunimi midis dy institucioneve. “Mundësia e bashkëpunimit midis dy institucioneve do të sjell pasurimin e arkivave, me dokumente historike dhe shumë dokumente të tjera që flasin mbi historinë e marrëdhenieve midis dy vendeve”,- tha z. Dinko Cutura.

Drejtori i Përgjithshëm i Arkivava Dr.Ardit Bido falenderoi përzemërsisht për ftesën dhe për mundësinë për të rinovuar marrëveshjen midis Arkivave Kombëtare të Kroacisë dhe Arkivit Qendror Shtetëror të Shqipërisë. “Fokusimi ynë qëndron në qëllimet tona të përbashkëta mbi shkëmbimin e dokumenteve arkivore. Në Arkivin e Shqipërisë ruajmë dokumente që pasqyrojnë marrëdhëniet e Shqipërisë me Kroacinë, pavarësisht që sasia e tyre nuk është e njëjtë me sasinë që keni ju në arkivin tuaj, unë mendoj që sot ne kemi kapacitetin dhe mjetet për të shkëmbyer ato dokumente nëpërmjet digjitalizimit”,- u shpreh Dr.Bido.

Në fund të këtij takimi Drejtori i Arkivave Shtetërore të Kroacisë, së bashku me specialistët e tij, i prezantuan përfaqësuesve nga Arkivi Qendror Shtetëror i Republikës së Shqipërisë disa dokumente mbi shqipërinë që i ruanin në arkivin e tyre.

Bashkohen arkivat shqiptare të Shqipërisë, Kosovës e Maqedonisë

By | Uncategorized | No Comments

Organizohet Konferenca e III Mbarëkombëtare e Arkivistikës në Shkup

Drejtoria e Përgjithshme e Arkivave, së bashku me Agjencinë e Arkivave të Kosovës dhe Institutin e Trashëgimisë Shpirtërore e Kulturore të Shqiptarëve të Maqedonisë së Veriut organizuan në Shkup Konferencën e III Mbarëkombëtare të Arkivistikës, pas konferencave pararendëse të zhvilluara dy vitet e fundit në Tiranë e Prishtinë. Kjo konferencë është një tentativë për të thyer kufijtë shtetërorë në fushën e arkivistikës dhe për të bashkuar të gjithë ata që ruajnë memorien kolektive kombëtare shqiptare, pavarësisht shtetit ku punojnë.

Drejtori i Përgjithshëm i Arkivave, Dr. Ardit Bido vlerësoi se kjo konferencë mundëson rritjen e kohezionit kombëtar në fushën e arkivistikës dhe se Shkupi ishte mikpritësi i natyrshëm i radhës pas Tiranës dhe Prishtinës. Ai tha se arkivat janë tregues të civilizimit të një vendi dhe se vendet më të përparuara u kanë kushtuar shumë vëmendje arkivave. “Ne sot jemi arkivat e së nesërmes dhe gjyshërit tanë dje janë arkivat e të sotshmes. Nëse ne respektojmë veten tonë, duhet të respektojmë veten edhe përtej momentit që do të jemi gjallë. Sikurse paraardhësit tanë, duhet të respektojmë kujtimet e tyre, duhet të respektojmë atë se çfarë kanë bërë ata ne jetë dhe kontributin që kanë dhënë” u shpreh Dr. Bido.

Kjo konferencë, sipas drejtorit të ITSHK-së, Skender Asani, do të ndihmojë në begatimin e arkivit të institucionit që ai drejton, për të hulumtuar historinë, duke u bazuar në dokumente.

Ndërkaq, drejtori i Agjencisë Shtetërore të Arkivave në Kosovë, Ramë Manaj, tha se misioni i arkivave shqiptare është që të rrëfejnë historinë e përbashkët kombëtare. “Një popull, një histori. Një histori e cila, natyrisht, në periudha të ndryshme ka pasur edhe dallimet e veta dhe veçoritë e veta dhe që natyrisht ka një shtririje në gjithë gjeografinë shqiptare. Një histori e gjatë dhe e bujshme, e cila për t’u pasqyruar drejt dhe në plotni, unë jam i mendimit se do të duhet të futet në arkiva, jo për t’u mbyllur por që nga aty të eksplorohet me profesionalizëm dhe saktësi shkencore” u shpreh z. Manaj.

Në konferencë u paraqitën 26 kumtesa në lidhje me të drejtat e njeriut, informatizimin e arkivave, mendimin arkivor shqiptar, komunikimin dhe ruajtjen e dokumentacionit, pasurimin dhe bashkëpunimin mes arkivave. Qëllimi i kësaj konference është të mbledhë bashkë arkivistët e Shqipërisë, Kosovës dhe Maqedonisë, si dhe të tjerë arkivistë që punojnë apo studiojnë në fushën e arkivistikës. Konferenca u zhvillua në Shkup të Maqedonisë së Veriut e ku tashmë është kthyer dhe në traditë, pas dy konferencave mbarkombëtare të zhvilluara në Tiranë dhe Prishtinë.

 

AQSH pasurohet me mbi 5000 dokumente të vjetra

By | Uncategorized | No Comments

Gjoba drejtorëve nëse nuk dorëzojnë dokumentet e para vitit 1945

Drejtoria e Përgjithshme e Arkivave, gjatë inspektimeve në institucione të ndryshme të vendit, ka vërejtur se në kundërshtim me ligjin “Për Arkivat”, muzeume, shkolla dhe institucione të tjera, mbajnë jashtë çdo kriteri teknik dokumente para vitit 1945.

Ligji I arkivave  përcakton qartë se:

“Arkivi Qendror Shtetëror ruan, përpunon, administron dhe shërben:

  1. a) dokumentet që janë trashëguar nga shteti shqiptar nga periudha parashteterore;
  2. b) dokumentet që janë krijuar nga institucionet qendrore e vendore të administratës shtetërore deri në vitin 1944.

Në këtë kuadër, Drejtoria e Përgjithshme e Arkivave ka grumbulluar gjatë dy muajve të fundit, më shumë se 5000 dokumente me Rëndësi Historike Kombëtare, para vitit 1945.

Ndër to, mund të përmendim dokumente greqisht dhe osmanisht të shek. XIX dhe fillim shek.XX,

-Dokumete të Institutit “Nana Mbretreshë“ Tiranë të vitit 1933 e në vijim,

-Dokumente të Institutit Bujqësor në Kavajë te viteve 1939-1943,

-Të shkollës fillore femërore në Berat te vitit 1927,

-Amza të shkollave të ndryshme,

-Letra e Aqif Pashë Elbasanit 1920,

-Diplom e vitit 1916, etj.

Keto dokumente do t’u ofrohen studiuesve në kohë shumë të shkurtër, pas përpunimit të tyre.

Drejtoria e Përgjithshme e Arkivave u bën apel të gjitha institucioneve shtetërore që mbajnë dokumente të këtij lloji dhe që ende nuk janë inspektuar nga DPA, t’i dorëzojnë ato sa më shpejt, sipas ligjit. Në të kundërt, do të merren masat përkatëse administrative ndaj titularëve dhe punonjësve të sekretari-arkivave të këtyre institucioneve.

 

Ekspozita “Lidhja e Prizrenit 1878-2019 mes dokumeneteve të Arkivit Qendror Shtetëror”

By | Uncategorized | No Comments

Drejtoria e Përgjithshme e Arkivave në bashkëpunim me Kalanë e Tiranës çelën sot ekspozitën “Lidhja e Prizrenit 1878-2019 mes dokumeneteve të Arkivit Qendror Shtetëror”. Kjo ekspozitë vjen në kuadër të 141 vjetorit të Lidhjes së Prizrenit ndërsa shfaqen dokumente të rralla, si thirrja drejtuar gjithë shqiptarëve ku ftohen të kundërshtojnë coptimin e trojeve të shqiptarëve apo dhe Memorandumin e dërguar tek Kryeministri i Mbretërisë së Bashkuar, përmes të cilit kundërshtojnë vendimet e Kongresit të Berlinit dhe copëtimet e trojeve shqiptare.

Më 10 qershor 1878 u mbajt në Prizren Lidhja e Prizrenit e cila ishte lëvizja e parë e shqiptare e madhe e organizuar në mënyrë administrative, politike, ushtarake. Shqiptarët thirrën një kuvend mbarëkombëtar, ku do të merreshin vendime shumë me rëndësi për vendin. Pas firmosjes së marrëveshjes të Shën Stefanit mes Rusisë dhe Turqisë, ku Shqipërisë nuk iu njoh asnjë e drejtë territoriale, dhe në pritje të kongresit të Berlinit, i cili me shumë mundësi do t’i hiqte hartës shqiptare krahina të shumta, atdhetarët shqiptarë ideuan këtë mbledhje, ku do të shpallnin ndarjen përfundimtare nga sundimi osman.

Kuvendi priti delegatët pa dallim feje, ata do të vinin nga të katërt Vilajetet e Shqipërisë: Shkodrës, Manastirit, Janinës dhe Kosovës. Lidhja e Prizrenit, zgjati 5 ditë dhe numri i delegatëve shkoi në 110, ku mes tyre ishin Ahmet Koronica, Abdullah Pashë Dreni, Shaban Prizreni, Zija Prishtina, Filip Doda, Sulejman Vokshi, Shuajip Spahiu, Ali Ibra, Abdyl Frashëri, e shumë të tjerë, duke zgjedhur si kryetar anëtarin më të vjetër i cili kishte dhe fuqi të madhe morale, Iljaz Pashë Dibrën,

Në mbledhjen e datës 10 qershor 1878 u mbajtën fjalime nga delegatë të ndryshëm, një prej të cilëve dhe Abdyl Frashëri ku ndër të tjera tha: “Ne Shqiptarët rrjedhim nga Pellazgët e jemi populli ma i vjetër ktu në Ballkan kurse Slavët erdhën vonë e duke qenë në shumicë të madhe na shtynë në Jug-Perëndim të Ballkanit në ktë rrype të ngushtë ku ndodhemi sot. Nuk qe mjaft grabitja që na banë athere po kërkojnë sot me na shkitë edhe tokë të tjera. Kta na kërkojnë Plavë e Guci e Grekët nji copë të Vilajetit të Janinës e cila asht pjesë e pa-ndame e Atdheut tonë të dashun.
“Qëllimi i ksaj mbledhjeje sot asht me u-a pre hovin ktyne anmiqve të pa-shpirtë, duke lidhë besën shqiptare e duke u-betue me i mbrojtë me gjak trojet që na kanë lanë gjyshët dhe katragjyshët t’onë”.
Motoja e kësaj mbledhjeje ishte: “Të luftojmë dëri sa të derdhim pikën e fundit të gjakut. Para interest t’atdheut të çduken interesat private”.

Delegatët para së gjithave shihnin të rëndësishëm sigurimin e qetësisë dhe të zhdukjes së gjakmarrjes, dhe nëse jo përgjithnjë të paktën dëri sa të rregullohej situata e Shqipërisë. Lidhja e Prizrenit vepronte njësoj si një qeveri kombëtare duke sunduar dhe rregulluar krahinat e qytetet e Shqipërisë për sa i përket administratës gjithashtu mblidhte luftëtarë edhe taksa.

Dy vendimet e para që mori Lidhja e Prizrenit ishin një peticion nisur Kongresit të Berlinit dhe një tjetër perandorisë osmane. Në këto vendime i bënin të qartë se Shqipëria nuk mund të jepte asnjë pëllëmbë tokë nga viset e saj, të shoqëruara më dhjetëra firma nga delegatët pjesëmarrës.